Камо бежим от Тебе, Господи Боже наш? В кую страну скрыемся от лица Твоего? Небо — престол Твой, земля — подножие ног Твоих, в море пути Твоя, в преисподней владычество Твое.

Грех и неправд наших ради найде иногда смертоносная пагуба на землю нашу, от неяже земля и воздухи прокажения прияша, источницы водний огорчеша, болезни и язвы смертныя и неисцельныя на человеки приидоша.

Благослови, Господи, всесильною десницею Твоею землю Чернобыльскую! Услади воды ея, якоже усладил еси Моисеом древле горькия воды Мерры. Сотвори воздухи ея благорастворенны, села и вертограды плодоносны и безвредны, якоже быша прежде, да прославляется тем Имя святое Твое .

Сие летное воспоминание ныне творяще, молим Ти ся прилежно, Владыко Благий и Всещедрый, не вниди в суд с рабами Твоими, отврати страшный гнев Твой, праведно на ны движимый, устави грозный меч Твой и пощади раб Твоих, яко да в предняя николиже приидет на ны напасть черно-быльския пагубы.

Ты, Господи, веси яко неправды наша велии суть, мы же ведаем, яко велии щедроты Твоя. Аще не умилостивят Тя щедроты Твоя, в час той погибнути имамы за беззакония наша. Не остави нас, Господи, Господи; яко мы рабы двора Твоего, ядущии Божественний Плоть и Кровь . Не отврати, Господи, лица Твоего от исповедающих святое Имя Твое.

Молим благость Твою, Господи всяческих, отпусти нам прегрешения наша, презри беззакония наша; отверзи нам двери щедрот Твоих, Господи, да приидут к нам времена мирна и благорастворенна, и по щедротам Твоим милостивно прийми молитву нашу, зане кающимся, Ты Господи, отвер-заеши входа двери.

Помилуй ны, якоже помиловал еси разбойника и мытаря, покаявшихся Тебе. Очисти ны, якоже очистил еси десять прокаженных, Твоего милосердия взыскавших. Оживотвори ны и совоскреси, имаши бо власть мертвыя воскрешати.

Помяни Господи, погибшия от чернобыльския пагубы братию и сестер наших, и от неисцельных болезней умершия, и упокой я, идеже присещает свет Лица Твоего. Помяни, Господи вся пострадавшия от напасти чернобыльския пагубы, вся потрудившияся и трудящияся во Чернобыле, просвети их очи мысленныя к познанию Тебе, Истиннаго Бога нашего, даруй им здравие и долгоденствие, миром и благоденствием благослови я.

Яко Ты Бог милостей, и щедрот, и человеколюбия еси, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.